Би 'integrative approach' буюу сэтгэл зүйн нэгдмэл арга барилыг ашигладаг сэтгэл зүйч юм. Өөрөөр хэлбэл Хүмүүнлэг сэтгэл судлал, Танин Мэдэхүйн Зан Үйлийн сэтгэл судлал (CBT), Хүлээн Зөвшөөрөл, Зорилгодоо Тууштай байх сэтгэл судлал (ACT) зэрэг сэтгэл судлал, сэтгэл заслын янз бүрийн чиглэл загваруудын санаа, арга техникийг хослуулан ашиглаж ажилладаг гэсэн үг юм. Хүн бүр өөр өөр гэдэг зарчим баримтлан тухайн хүний хувийн онцгой хэрэгцээ, өвөрмөц нөхцөл байдалд тохирсон сэтгэл зүйн зөвлөгөө заслын төлөвлөгөөг боловсруулж ажилладаг. Би үйлчлүүлэгч-тэйгээ сэтгэлээсээ, үнэнч шударгаар 'therapeutic relationship' буюу сэтгэл зүйн зөвлөгөө заслын нандин итгэлцэл бүхий холбоог үүсгэхэд чухалчлан төвлөрдөг ба энэ нь тухайн хүн шийдэхийг хүссэн асуудлаа бүрэн дүүрэн илэрхийлэх, олон өнцгөөс харах, шийдлийг дотроосоо олох, ухаарах, шийдэхийг хүссэн асуудалд эерэг өөрчлөлтийг бий болгоход гол түлхүүр гэж итгэдэг. Энэхүү сэтгэл зүйн зөвлөгөө заслын нандин итгэлцэл бүхий холбоог тогтоох, хадгалахын тулд сэтгэл зүйч би таныг шүүмжлэлгүйгээр хүлээн зөвшөөрөх, таны давуу тал чадварууд дээр суурилсан арга техникийг санал болгох, халуун дулаан аюулгүй байдлыг мэдрүүлэх, хүндэтгэл, харилцан ойлголцол, нээлттэй байдал, шударга байдлыг харилцаандаа эрхэмлэх юм. Анх удаа сэтгэл зүйн зөвлөгөө үйлчилгээнд хамрагдах гэж байгаа бол энэ нийтлэлийг маань уншаарай.